البلطجي

1-    والبلطجي
        الْغارقْ فْ الْحزْقه
      تعطيه طعريجة
     ومعاها زرقه
     يخرج للزنقه
     يجمع لك حلقه
    ويولي نفار
     يهرنق ويكول :
  غدا العيدْ !
   **************
2-    والبلطجي
الْكاري حنكو
باع لقلمْ
لمول الدرهمْ
تعطيه عظمْ
يولي يفهمْ
معاك يكاجي
تكول ليه أجي
يجي يزربْ
بحال الْكلبْ
ما عندو مذهبْ
ولا دينْ
ف رمشة عينْ
يولي عليمْ
ويفتي ويكولْ :
العام زينْ !
**************
3-    والبلطجي
فيه وفيه
مرة هنا
ومرة لهيهْ
يسمعْ ويطيعْ
بحال الْقطيعْ
عايش ذليلْ      
يشري ويبيعْ
ف ظلام الليلْ
على فمو لجامْ
باع عَزُو
فين ما تنغزو
يكولْ نْعَامْ !
**************
4-    خونا البلطجي
هُوَ هُوَ
يعشقْ الفوضى
وًاْلفُتُوه
مرة حمارْ
مرة دنفيلْ
مرة كيدارْ
مرة فيلْ
ويكولْ عند راسو :
مناضلْ !